Ciamp dla furmazion y cultura
Nsenianc de rujeneda dl’oma ladina, che à fat l ejam de maduranza te na scola auta tudëscia o taliana, dëssa nce pudëi nsenië te na scola tudëscia o taliana. Chi che fina l stude master per ladin dla Facultà de Scienzes dla Furmazion per l Raion primer dla Università liedia de Bulsan dëssa avëi la puscibltà de nsenië tla scoles primeres dl Südtirol. Dlonch (nce dedora dla valedes ladines), ulache l ie inuemes de luesc ladins storics, dëssa chisc inuemes nce unì adurvei. L Istitut Ladin dëssa unì numinà tl Statut d’Autonomia coche istitut de referimënt per la cuestions cultureles ladines. Ala medema maniera dëssen avëi na garanzia per l finanziamënt dla lies cultureles ladines. Persones de rujeneda ladina dëssa vester reprejentedes te duta la majera istituzions cultureles (p.ej. tla Università Liedia de Bulsan, tl Conservatore y nsci inant). Nce dedora dla valedes ladines dëssen pudëi mparé ladin y l dëssa nce vester scoles trilingueles.
Ladins dedora dla valedes ladines
L proporz dassëssa unì mujelà per persones de rujeneda dl’oma ladina che viv dedora dla valedes ladines, nce per ti dé azes, sce n cajo che les ëssa da vëncer i cuncorsc curespundënc, ala stieres resservedes ala persones de rujeneda taliana y tudëscia. N auternanza a chësc pudëssen preudëi n proporz minim dl 5% de duta la stieres per i ladins y la ladines. L suplemënt per l trilinguism ti dassëssa unì cunzedù nce ai dependënc publics dedora dla valedes ladines.
Reprejentanza di Ladins tla istituzions
L vën ghirà na reprejentanza de mendranza per la grupa de rujeneda ladina garantida dal Statut per duta la istituzions, cumiscions y i organs aministratifs de sozieteies publiches (p.ej. TAR, Cunsëi de Stat, Cumiscion di Sies y di Dodesc). L dëssa unì crià na zircoscrizion litela ladina a chëla che l ti spieta de mandé tl Cunsëi provinziel doi cunselieres. L dëssa nce unì fissà a livel legislatif la presënza de n assessëur ladin y de n terzo reprejentant ladin dl Presidënt dla Provinzia.
Unità di ladins y lingaz unificà
Per sustenì la unità ladina dëssen: crië n comprensore ladin, fé n referendum per l’agregazion ti trëi chemuns ladins de Souramont tl Venet al Südtirol, o almanco fé a na moda che l vënie arjont n’autonomia dla scola ladina tl Venet, renfurzé la Lia di Comuns Ladins y la culaborazion danter chësta y la Union Generela di Ladins sciche nce danter la scoles tla Vala Badia, te Gherdëina, Fascia, Fedom y Ampëz. Dla ntroduzion dl lingaz scrit unificà vëniel rujenà a na maniera controversa y l vën damandà l’elaburazion da pert de espertes y esperc de na pruposta realisabla: da una na pert dëssela purté pro al renfurzamënt dla identità ladina, ma dal’autra pert nce tenì cont dla particulariteies idiomatiches dla valedes. Tla scoles de basa dëssel unì nsenià inant la varianta de valeda ntan che duc i documënc aministratifs dëssa unì scric tl lingaz unificà. L vën purtà a esprescion che n “lingaz artifiziel“ ne unissa nia drë azetà y n auternanza vëniel fat la pruposta de sëurantò na varianta de valeda (p.ej. l ladin de Mesaval) sciche lingaz unificà. L vën nce rujenà de mëter a jì n referendum per la ntroduzion dl Ladin Standard.
