“Cie che vën da sëul se n va nce da sëul”, nscì vëniel dit, ma aspité che mudazions se porte pro da sëules ne ie ënghe deguna soluzion. Dan plu che 40 ani se à n valgun reprejentanc dla populazion de ududes lerges rendù cont ce problems che tribulova la jënt. L fova politics singui che à dat dant la direzion te chëla che l Südtirol se ëssa muet. Dal 1972 iel unit fat truep. Y truep ie autramënter: duta la populazion dl Südtirol dëssa lauré pea per respuender ala gran dumandes cun chëles che son cunfruntei. Co dëssa pa nosc ncësa se svilupé ti dejeneies che vën? Co ulons’a nëus y nosc mutons viver tl daunì? Co dëssel pa unì fat politica tl Südtirol?
Perchël mët l Cunsëi provinziel a jì la Cunvenzion per l pruzes de reforma dl’autonomia. Tl scumenciamënt dl 2016 meteral nsci man n pruzes de partezipazion sot al moto “pensé pea l Südtirol”. Duta la persones residëntes tl Südtirol arà la ucajion de pensé y rujené pea – de si daunì persunel y dl daunì dla sozietà de nosta provinzia.
Te chësc cheder dëssela da una pert jì de tematiches da uni di, che à da nfé cun nëus diretamënter: Co dëssa pa cialé ora la scoles te chëles che nosc sculeies y nosta sculées jirà tl daunì? Co unirà pa tl daunì regulamentà l sistem saniter y chi tulerà pa la dezijions n chësc cont? Co dëssa pa la zitadines y i zitadins tò pert ala politica dl Südtirol?
Ma dal’autra pert dëssel nce unì tratà la gran cuestions: Ce funzions arà pa l Südtirol tl’Europa? Co cialerà pa ora i raporc cun l stat talian? Ce minonga à pa la populazion dl Südtirol n cont dl’autonomia plëina, de n stat autonom o de na macroregion tla Elpes o n cont de n jì de reviers pra l’Austria?
Duta la persones dl Südtirol dëssa pensè l’Südtirol. Tla Cunvenzion per l pruzes de reforma dl’autonomia.
